Rossbax: Afrikada mənzil çatışmazlığı 2030-cu ilədək 130 milyonu ötəcək

2050-ci ilədək Afrikanın şəhər əhalisinin sayı 600–900 milyon nəfər artacaq.

"Report" xəbər verir ki, bu barədə BMT-nin Məskunlaşma Proqramının (UN-Habitat) icraçı direktoru Anaklaudia Rossbax Bakıda WUF13-də bildirib.

Onun sözlərinə görə, bu nəhəng rəqəmlər Afrika qitəsinin üzləşdiyi çağırışın miqyasını əyani şəkildə nümayiş etdirir. "Məhz burada, Cənub-Şərqi Asiya ilə yanaşı, bu gün dünya əhalisinin əsas artımı cəmləşib", - Rossbax vurğulayıb.

Onun sözlərinə görə, artıq bu gün Afrikada mənzil çatışmazlığı 60 milyonu ötür və indiki urbanizasiya templəri qorunub saxlanılarsa, 2030-cu ilə qədər bu göstərici 130 milyonu keçəcək. "Bu sahədə maliyyə boşluğu nəhəngdir və 1,4 trilyon ABŞ dollarından çoxdur", - BMT-nin müvafiq qurumunun rəhbəri qeyd edib.

O xatırladıb ki, BMT-nin 2030-cu ilədək olan dövr üçün Dayanıqlı İnkişaf sahəsində Gündəliyinin məqsədlərinə nail olmaq üçün son müddətə cəmi dörd il qalır. "Və bütün bunlar Afrikada dünyanın digər regionlarına nisbətən daha sürətlə gedən urbanizasiya prosesinin sürətlə cərəyan etməsi fonunda baş verir", - UN-Habitat-ın icraçı direktoru bildirib.

Bununla belə, Rossbax hesab edir ki, mövcud böhran mənzil tikintisi, bələdiyyə infrastrukturu, iqlimə davamlı tikinti və "yaşıl binalar"a keçid sahələrində həm də nəhəng investisiya imkanları açır.

Sonda UN-Habitat rəhbəri xatırladıb ki, cəmi ayyarım əvvəl Nayrobidə Afrika İttifaqının və Keniya hökumətinin himayəsi altında təşkil olunmuş ikinci Afrika Şəhər Forumu uğurla başa çatıb. "O zaman hakimiyyət orqanlarının nümayəndələri, şəhər merləri, beynəlxalq inkişaf tərəfdaşları, özəl sektor və vətəndaş cəmiyyəti ümumi və çox aydın bir anlayış ətrafında birləşdilər: Afrika şəhərlərinin gələcəyi bizim bu onillik ərzində infrastruktur layihələrini məhz necə maliyyələşdirəcəyimizdən və həyata keçirəcəyimizdən birbaşa asılıdır", - Anaklaudia Rossbax deyib.