Patrisiya Skotlend: Mənzil sektoru iqtisadi aktiv kimi nəzərdən keçirilməlidir

Mənzil sektoru sosial xərc kimi deyil, əhəmiyyətli özəl kapital cəlb edə bilən iqtisadi aktiv kimi qəbul edilməlidir.

"Report" xəbər verir ki, bu barədə Böyük Britaniya Lordlar Palatasının üzvü, Millətlər Birliyinin sabiq baş katibi Patrisiya Skotlend Bakıda WUF13 çərçivəsində keçirilən tədbirdə bildirib.

Onun sözlərinə görə, dünyada böyük həcmdə kapital və daşınmaz əmlaka kəskin ehtiyac var, lakin onlar arasındakı mövcud qarşılıqlı əlaqə sistemi pozulub.

O qeyd edib ki, investorlar üçün torpaq üzərində dəqiq hüquqları və proqnozlaşdırıla bilən gəlirliliyi özündə ehtiva edən layihələr çatışmır.

Skotlendin sözlərinə görə, Ruanda və Syerra-Leonedə torpaqların qeydiyyatına texniki dəstək sənədlərin hazırlanması vaxtını iki dəfə azaltmağa imkan verib.

O əlavə edib ki, yerli hakimiyyət orqanları bu zəncirdə ən mühüm həlqə kimi çıxış edir, çünki icazələri verən və infrastrukturu inkişaf etdirən məhz şəhərlərdir. O qeyd edib ki, bələdiyyələrin əksəriyyəti kredit qabiliyyətinin aşağı səviyyədə olması səbəbindən tikinti üçün borc cəlb edə bilmirlər.

"Şəhər su təchizatı və yol infrastrukturunun maliyyələşdirilməsi üçün istiqrazlar buraxa bildikdə, bir qayda olaraq, bunun ardınca mənzil tikintisinin inkişafı başlayır", - o qeyd edib.