Orta Dəhliz yükdaşımaların sistemli şəkildə artırılması üçün Avropa bazarına çıxır

Orta Dəhliz boyunca yerləşən dövlətlər Qərbdən Şərqə istiqamətində yük bazasının cəlb edilməsi üzrə sistemli yanaşma qurmaq üçün avropalı tərəfdaşlarla intensiv qarşılıqlı fəaliyyətə başlayıblar.

"Report" xəbər verir ki, bu barədə "Azərbaycan Dəmir Yolları" (ADY) QSC sədrinin müşaviri Emil Məmmədov Bakıda keçirilən V "Qara dəniz-Xəzər Logistika Forumu 2026"da bildirib.

Müşavirin sözlərinə görə, əvvəllər Orta Dəhliz əsasən onun bilavasitə iştirakçıları arasında təşviq edilirdi: "Müvafiq tədbirlər Çin, Qazaxıstan, Azərbaycan, Gürcüstan və ən yaxşı halda Türkiyədə təşkil olunurdu. Orta Dəhliz gündəliyi ilə Avropa bazarına demək olar ki, heç kim çıxmırdı, çünki marşrut özünün təbii formalaşma mərhələsini yaşayırdı. İndi biz Qərbdən Şərqə istiqamətində yük bazasının cəlb edilməsi üzrə sistemli iş qurmaq üçün avropalı tərəfdaşlarla fəal qarşılıqlı fəaliyyətə keçmişik. Əminik ki, Avropa biznesi yerli operatorların təşviq etdiyi konsepsiyalara daha çox etibar edir. Buna görə də məqsədimiz hər iki tərəf üçün maraq kəsb edən qarşılıqlı faydalı tərəfdaşlıq qurmaqdır".

E.Məmmədov bildirib ki, cəlb edilən yüklərin kateqoriyası ixrac axınlarının xüsusiyyətləri ilə müəyyən edilir: "Söhbət Avropa ərazisində istehsal olunan, yüksək əlavə dəyərə malik hazır məhsullardan, xüsusən də avtomobil sənayesi məhsullarından və komplektləşdirici hissələrdən gedir. Tam siyahı daha sonra formalaşdırılacaq, çünki bu siyahı dəhlizin yük göndərənlərə hansı şərtləri təklif edə biləcəyindən asılıdır. Burada zaman amili və xidmət səviyyəsinə dair razılaşmaya riayət olunması həlledici rol oynayır. Biz müəyyən xidmət standartlarını təmin etməyə borcluyuq ki, yük göndərənlər özlərini maksimum dərəcədə arxayın hiss etsinlər. Bu, genişmiqyaslı və çoxşaxəli bir vəzifədir. Hesab edirik ki, artıq 2027-ci ildən etibarən ilk nəzərəçarpacaq nəticələr ortaya çıxacaq və biz Qərb-Şərq istiqamətində daşıma həcmlərini planlı şəkildə artırmağa başlayacağıq".