Nazirlik rəsmisi: "İqtisadi inkişaf üçün AI-yə və rəqəmsallaşmaya sərmayələr artırılmalıdır"

İqtisadi inkişaf üçün süni intellekt (AI) və rəqəmsallaşmaya sərmayələr artırılmalıdır.

"Report" xəbər verir ki, bunu Rəqəmsal İnkişaf və Nəqliyyat Nazirliyinin Nəqliyyat siyasəti şöbəsinin Beynəlxalq nəqliyyat əməliyyatları sektorunun müdiri Aytən Turabova Bakıda keçirilən II Xəzər Beynəlxalq Nəqliyyat, Tranzit və Logistika Forumunda bildirib.

Onun sözlərinə görə, dəhlizin üstünlüyü bu amillərin bir-biri ilə sıx bağlı olmasından qaynaqlanır: "Yüklərin və informasiyanın hərəkət sürəti nə qədər yüksək olarsa, dəhlizin səmərəliliyi və rəqabətqabiliyyətliliyi də bir o qədər artır. Buna görə də hər iki istiqamətə paralel şəkildə investisiya yatırılmalıdır. Bu, əvvəl səsləndirilən sualla da birbaşa əlaqəlidir. İnvestisiyalar həm fiziki infrastruktura, həm də rəqəmsallaşma və süni intellekt (AI) texnologiyalarının tətbiqinə yönəldilməlidir. Qlobal rəqabət şəraitində iqtisadi inkişafı təmin etmək və rəqabət üstünlüyü qazanmaq üçün bu sahələrin hamısına eyni vaxtda sərmayə qoyulması vacibdir".