İspaniyalı ekspert: "Bütün mənzil layihələri vahid strategiya əsasında həyata keçirilməlidir"

Bütün mənzil layihələri vahid strategiya əsasında həyata keçirilməlidir.

"Report" xəbər verir ki, bunu İspaniyanın Kataloniya Hökumətinin Ərazi, Mənzil və Ekoloji Keçid Departamentində Şəhərsalma və Memarlıq üzrə Baş Direktoru Elisabet Cirici Amiell Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Dayanıqlı İnkişaf Məqsədlərindən Mənzillərə" adlı tədbirdə deyib.

Onun sözlərinə görə, əsas məqsəd yalnız şəhər gündəliyinin qəbul edilməsi deyil, onun praktiki icrasını təmin etməkdir: "Hazırda bu istiqamətdə irəliləyirik. Gələn həftə hökumət səviyyəsində şəhər gündəliyi ilə bağlı fəaliyyətlərimizi gücləndirəcək yeni təsdiqin alınması planlaşdırılır. Torpaq və mənzil inkişafı ilə bağlı bütün layihələrin vahid strateji çərçivə altında həyata keçirilməsi əsas prioritetlərdən biridir. Bu, həyata keçirdiyimiz bütün layihələrin eyni yanaşma və prinsiplər əsasında inkişaf etdirilməsinə imkan verəcək".