Ekspert: "Yeni Şəhərsalma Gündəliyi yerli qərar qəbul etmə sistemlərinə inteqrasiya edilməlidir"

Yeni Şəhərsalma Gündəliyi (New Urban Agenda) müstəqil qlobal çərçivə kimi deyil, yerli qərar qəbul etmə sistemlərinə inteqrasiya edildikdə uğurlu olur.

"Report" xəbər verir ki, bunu Böyük Britaniyanın Yaradıcı İnnovasiya Təcrübəsi, Siyasət Laboratoriyasının rəhbəri Lara Kinneir Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Yeni Şəhərsalma Gündəliyi (NUA) üzrə növbəti 10 il üçün birgə səylərimiz" adlı tədbirdə bildirib.

Onun sözlərinə görə, inteqrasiya həqiqətən baş verdikdə, mənzil siyasəti iqtisadi siyasətlə və nəqliyyat siyasəti ilə əlaqələndikdə, nailiyyət məhz o zaman əldə olunur: "Ən güclü təkanverici amil milli siyasət ilə yerli icraat arasındakı uyğunluq idi. Beləliklə, milli, regional və yerli dialoqların olduğu mühitləri müşahidə etdikdə, yenə də uğurun əldə olunduğunu gördük. Hətta büdcə sistemlərində də Dayanıqlı İnkişaf Məqsədlərinin lokallaşdırılması mövcud idi. Həmçinin, güclü şəhər məlumatları və monitorinq sistemləri olan şəhərlərin irəliləyişdəki boşluqları və kompromisləri müəyyən etməkdə daha bacarıqlı olduqlarını müşahidə etdik. Məlumatlara çıxış olmadıqda və ya məlumatlar dövlət qurumları, yerli şəbəkələr və hökumət arasında parçalandıqda, bu, işi çox çətinləşdirir və icraatın böyük hissəsini ləngidir".

Qonaq əlavə edib ki, Yeni Şəhərsalma Gündəliyinə cavab olaraq yaradılan şəhər fəaliyyət planları ayrı-ayrı sektorlara əsaslanan müdaxilələrdən daha effektiv olduğunu sübut edib: "Yenə də, istər alim, istər memar, istər dizayner, istərsə də vətəndaş olsun, hər kəsin ətrafında toplaşa biləcəyi bir planın hazırlanması, hər kəsin riayət edəcəyi bir baxışın formalaşdırılmasına kömək edir. Bu mənada institusional davamlılıq və liderlik çox vacib idi. Uzunmüddətli icraat mandatlar, rutinlər, bacarıqlar və tərəfdaşlıqlar tələb edir".