Ekspert: "Şəhərlər qeyri-sabitliyi və resurs qıtlığı risklərini artırırlar"

Şəhərlər qeyri-sabitliyi və resurs qıtlığı risklərini artırırlar.

"Report" xəbər verir ki, bunu BMT-nin Ətraf Mühit Proqramının (UNEP) məsləhətçi Din Şarp Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Daha təhlükəsiz və dayanıqlı şəhərlərin formalaşdırılması: Şəhər iqlimi, sülh və təhlükəsizlik üzrə siyasət sənədinin layihəsi"nin müzakirəsində bildirib.

Onun sözlərinə görə, inklüzivlik məsələsində, hətta ən yaxşı niyyətlər belə, insanların düşdüyü və uyğunlaşmağa məcbur olduğu şərait səbəbindən hər zaman tam şəkildə reallaşa bilmir: "Buna baxmayaraq, biz inklüzivliyə həqiqətən fundamental prinsip kimi yanaşırıq. Məncə, bu yanaşma proqramın mahiyyətinin və fəaliyyət prinsipimizin əsasını təşkil edir. Eyni zamanda, iqlim dəyişikliyi və urbanizasiyanın yaratdığı gərginliklər deterministik, yəni qaçılmaz deyil. İnsan fəaliyyəti və iradəsi bütün proqram dizaynlarında və çərçivələrində həlledici rol oynayır. Başqa sözlə, korrelyasiya səbəbiyyət demək deyil. Məsələn, Suriyada çoxsaylı gərginliklər mövcud idi. Lakin üsyana səbəb olan əsas amillərdən biri hökumətin avtoritar və repressiv siyasəti idi".

"Burada üç əsas gərginlik amili xüsusilə diqqət çəkir. Birincisi, şəhər qeyri-sabitliyi çox vaxt resurs qıtlığı ilə əlaqəli olur. İkincisi, silahlı və kriminal qruplaşmalar qıtlıqdan, şəhər mühitindən və miqrasiya həssaslığından istifadə edərək vəziyyəti daha da gərginləşdirə bilirlər. Üçüncüsü isə bütün bunların həm ekoloji, həm də çoxsəviyyəli şəhər idarəçiliyi baxımından son dərəcə mürəkkəb bir mühitdə baş verməsidir. Bu proseslər idarəetmənin müxtəlif səviyyələri, regional əlaqələrin əhəmiyyəti və geri bildirim mexanizmlərinin milli, daha sonra isə çoxtərəfli beynəlxalq səviyyəyə ötürülməsi ilə müşayiət olunur", - deyə ekspert əlavə edib.