Ekspert: "Amazon bölgəsində quraqlıq infrastrukturu iflic vəziyyətinə salır"

Amazon bölgəsində quraqlıq infrastrukturu iflic vəziyyətinə salır.

"Report" xəbər verir ki, bunu İqlim Dəyişikliyi üzrə Hökumətlərarası Ekspert Qrupunun (IPCC) "İqlim Dəyişikliyi və Şəhərlər" üzrə Xüsusi Hesabatının 4-cü Fəslinin Əlaqələndirici Baş Müəllifi ​José Antônio Puppim de Oliveira Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "İqlim cəbhələrindən hekayələr" adlı tədbirdə bildirib.

Onun sözlərinə görə, şəhərlər haqqında düşünəndə söhbət təkcə mənzil təminatından və ya infrastrukturun dolanışıq vasitələrindən getmir: "Son bir neçə ildə layihələr çərçivəsində orada şahidi olduğum və Amazonun üzləşdiyi ən böyük problem, əslində, infrastrukturda yaşanan quraqlıqdır. Quraqlıq olanda bütün infrastruktur iflic olur. Amazonun bir çox yerində quru yolları yoxdur. Hər yerə qayıqla, çay vasitəsilə gedilir. ​Böyük bir quraqlıq olduqda bu, vəziyyəti çox çətinləşdirir. Nəqliyyat problemləri yaranır; həmçinin xidmətlər, xüsusən də Amazondakı bir çox səhiyyə xidmətləri qayıqlar vasitəsilə həyata keçirilir. Qayıqlar lazımi yerlərə çata bilmir. Bundan əlavə, insanların istehsal etdiyi bir çox məhsul və mallar çatdırıla bilmir".

"​Yerli hökumətlərlə bağlı da bir çox problemlər var. Belə ki, təbii fəlakət baş verəndə onlar müəyyən qədər vəsait alırlar. Mən 2023-cü ildə bu böyük quraqlıq baş verən zaman Para ştatının ikinci böyük şəhəri olan Santaremdə idim. Fəlakət üçün ayrılan bütün vəsait, demək olar ki, tamamilə nəqliyyata xərcləndi. İnsanları əraziyə gətirmək və oradan çıxarmaq üçün istifadə olundu, çünki əhali bəzi məhəllələrdə köməksiz vəziyyətdə qalmışdı. Hətta şəhərin daxilindəki bəzi məhəllələrə yalnız qayıqla daxil olmaq mümkündür. Su olmadıqda isə bu problemlərlə qarşılaşırsınız", - deyə qonaq əlavə edib.