Anaklaudia Rossbax: Mənzil böhranı dərinləşir, qeyri-rəsmi yaşayış məntəqələri risk altındadır

Mənzil böhranı dərinləşir, evlər əlçatmaz, qeyri-rəsmi yaşayış məntəqələri risk altındadır.

"Report" xəbər verir ki, bunu BMT-nin Məskunlaşma Proqramının (UN-Habitat) icraçı direktoru Anaklaudia Rossbax "Dünya şəhərləri hesabatı (2026)"nın təqdimatında deyib.

Onun sözlərinə görə, hazırda mənzillərin qiyməti çox bahadır və dünya üzrə çox sayda insanın onu almağa və ya yaşayış sahəsi üçün ödəniş etməyə kifayət qədər pulu yoxdur:

"Eyni zamanda, ölkələrin bu boşluğu doldurmaq üçün çox fərqli fiskal imkanları var. Buna görə də bazarlar problemi "aşağı səviyyədə" həll edə bilmir, dövlət təklifi isə gözlənilən qədər geniş əhatəli olmur"

A.Rossbax qeyd edib ki, insanlar üçün xidmətlərə əlçatanlıq Qlobal Cənub üçün ciddi məsələ olsa da, indi bu problem Qlobal Şimalda da aktuallaşır:

"Artıq hər yerdə insanlar ev almağa və ya kirayə götürməyə pul tapa bilmirlər və bu, gənclər və şəhərlərdəki əhali üçün də problemə çevrilib. Digər tərəfdən, qeyri-formallıq elə bir miqyas alıb ki, artıq buna dözmək mümkün deyil. İnsanlar çox təhlükəli şəraitdə yaşayırlar. Təbii fəlakətlər zamanı ilk zərər görənlər məhz qeyri-rəsmi yaşayış məntəqələrində yaşayan və evlərini itirən insanlardır. Buna görə də, qeyri-formallıq məsələsinin bu hesabatda nə qədər təcili olduğu açıqdır və biz də üzləşdiyimiz mənzil böhranının mərkəzi komponenti kimi buna operativ reaksiya verməliyik".