Antonio Sampayo: "Urbanizasiya iqlim dəyişikliyinin ən aydın nəticələrindən biridir"

İqlim təhlükəsizliyi şəhərsalma və sülhün kəsişməsində mühüm çağırış kimi qiymətləndirilir.

"Report" xəbər verir ki, bunu BMT-nin İqlim Təhlükəsizliyi Mexanizminin məsləhətçisi Antonio Sampayo Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Daha təhlükəsiz və dayanıqlı şəhərlərin formalaşdırılması: Şəhər iqlimi, sülh və təhlükəsizlik üzrə siyasət sənədinin layihəsi"nin müzakirəsində bildirib.

Onun sözlərinə görə, iqlim təhlükəsizliyi sahəsi bu cür mürəkkəb çağırışlardan kənarda qala bilməyən bir sahədir: "Mən bunu mühüm bir çətinlik, eyni zamanda bir çağırış kimi qiymətləndirirəm. İnsanlar artıq ekologiya, iqlim və mənzil təminatı kimi sahələrdə mövcud bilikləri tətbiq etməyə və ya daha effektiv şəkildə tətbiq etməyə çalışırlar. Lakin bəzən üç fərqli problemin - şəhərsalma, iqlim, eləcə də sülh və təhlükəsizlik - kəsişmə nöqtələrini birlikdə nəzərdən keçirmək çətin olur. Bununla belə, ümid edirəm ki, fikrimi aydın ifadə edə bilirəm: bu üç sahə və onların kəsişməsi xüsusilə vacibdir. Çünki bu müzakirələr, bu təqdimat və ümumilikdə hazırlanmaqda olan hesabat - istəsəniz, fiziki qaralama nüsxəsini də əldə edə bilərsiniz - hələ ilkin mərhələdədir. Bu məsləhətləşmənin məqsədi də məhz "Qeyri-sabit Şəhər Ekosistemləri" adlı hesabatın hazırlanmasına töhfə verməkdir. Ədəbiyyat icmalından çıxardığım əsas nəticələrdən biri, bəlkə də müxtəlif sahələr üzrə ekspertlərin ən çox razılaşdığı məqam odur ki, urbanizasiya iqlim dəyişikliyinin ən aydın, mübahisəsiz nəticələrindən biridir".