Bakı metrosu ötən ay 17 milyon sərnişin daşıyıb

Bu ilin iyun ayında "Bakı Metropoliteni" QSC 525 min 292-si ödənişsiz olmaqla, 16 milyon 992 min 534 sərnişinə, yaxud orta statistik hesabla gün ərzində 566 min 418 nəfərə daşıma xidməti göstərib.

Bu barədə "Report"un sorğusuna cavab olaraq bildirilib.

Məlumata görə, bu, koronavirus (COVID-19) pandemiyasına qədər ən çox sərnişin daşınan 2019-cu ilin eyni dövrü ilə müqayisədə 6 %-ə yaxın, ötən ilin iyun ayına nisbətən isə 4 %-ə yaxın azalma deməkdir.

Ötən ay ən çox sərnişin iyunun 9-da (688 min 138 nəfər), ən az isə sərnişin isə iyunun 28-də (352 min 559 nəfər) daşınıb.

Bu ilin I yarısında isə Bakı metrosundan istifadə edənlərin sayı 108 milyon 776 min 677 nəfər təşkil edib. Bu, 2019-cu ilin ilk 6 ayı ilə müqayisədə 6,6 % az, 2022-ci ilin eyni dövrünə nisbətən isə 9,5 % çoxdur.