Ağakərim Səmədzadə: Təbiətə əsaslanan həllər şəhərsalma layihələrinin tərkib hissəsi olmalıdır

Təbiətə əsaslanan həllər mənzil siyasətlərinin və şəhərsalma layihələrinin tərkib hissəsi olmalıdır.

"Report" xəbər verir ki, bunu ekologiya və təbii sərvətlər nazirinin birinci müavini Ağakərim Səmədzadə WUF13 çərçivəsində "İqlim-mənzil əlaqəsi bərabərsizliyi və ya yerdəyişməni dərinləşdirmədən iqlimə davamlı mənzilləri genişləndirə bilərikmi?" mövzusunda keçirilən sessiyada deyib.

Onun sözlərinə görə, hazırda təbiət artan təzyiq altındadır:

"Dünya əhalisinin təxminən 58 faizi şəhərlərdə yaşayır və şəhər əraziləri getdikcə istilik dalğaları, daşqınlar, su qıtlığı və digər iqlimlə bağlı risklərə daha çox məruz qalır. Eyni zamanda, təbiət də artan təzyiq altındadır. Məhz buna görə təbiətə əsaslanan həllər mənzil siyasətlərinin və şəhərsalma layihələrinin tərkib hissəsi olmalıdır".

A.Səmədzadə qeyd edib ki, şəhərlərin inkişafı ilə təbiətin qorunması arasında aydın tarazlıq saxlanılmalıdır:

"Mənim fikrimcə, təbiətə əsaslanan həllər şəhər planlaşdırmasının hər mərhələsinə daxil edilməlidir. Azərbaycan bu yanaşmanı artıq mənzil və şəhər inkişafı siyasətlərində tətbiq edir. 2022–2026-cı illər üçün Sosial-İqtisadi İnkişaf Strategiyası və onun 2030-cu ilə qədər uzadılması "təmiz ətraf mühit və yaşıl artım"ı milli prioritetlər kimi müəyyən edir. Böyük Qayıdış Proqramı çərçivəsində Azərbaycan azad edilmiş ərazilərdə yaşıl enerji zonaları, "ağıllı şəhər" və "ağıllı kənd" konsepsiyaları, həmçinin ekosistemin bərpasını inkişaf etdirir".

O, Azərbaycan və Türkiyənin Cəbrayılda birgə tingçilik mərkəzinin yaradıldığını da vurğulayıb:

"Bu mərkəz Qarabağ və Şərqi Zəngəzurda yaşıllaşdırma fəaliyyətlərini dəstəkləyəcək. Azərbaycan bu yaxınlarda NDC 3.0 sənədini təqdim edib və hazırda Uzunmüddətli Aşağı Emissiyalı İnkişaf Strategiyasını hazırlayır. Bu məqsədlərə nail olmaq üçün təbiətə əsaslanan həllər və ekosistemin bərpası çox vacib olacaq. Məhz buna görə də bu il Azərbaycanın ev sahibliyi edəcəyi Ümumdünya Ətraf Mühit Günü "Təbiətdən ilhamlanaraq. İqlim üçün. Gələcəyimiz üçün" şüarı altında keçiriləcək".