Azərbaycanda stasionar nəqletmə vasitələri ilə daşımaların dəyəri azalıb

Bu ilin yanvar-iyun aylarında Azərbaycanda stasionar nəqletmə vasitələri ilə 11 milyard 210 milyon 431 min ABŞ dolları dəyərində 20 milyon 94 min 174 ton məhsul daşınıb.

“Report” Dövlət Gömrük Komitəsinə istinadən xəbər verir ki, 2023-cü ilin eyni dövrü ilə müqayisədə daşımaların dəyəri 31,8 %, həcmi isə 8,7 % azalıb.

Ötən 6 ay ərzində stasionar nəqletmə vasitələri ilə 11 milyard 161 milyon 316 min ABŞ dolları dəyərində 19 milyon 886 min 151 ton məhsul ixrac olunub, 49 milyon 116 min ABŞ dolları dəyərində 208 min 22 ton məhsul idxal edilib.

İlin birinci yarısında ixrac olunan məhsulların dəyəri 31 %, həcmi 5,2 % azalıb, idxal olunan məhsulların dəyəri isə 5,2 dəfə, həcmi 5 dəfə azalıb.