Rüşvət verməyə təhrik etməkdə təqsirləndirilən şəxslərə hökm oxunub

Dələduzluqda və rüşvət verməyə təhrik etməkdə təqsirləndirilən Lerik Rayon Mərkəzi Xəstəxanasında psixiatr-həkim işləmiş Balaş Təhməzov və Şirvan şəhər sakini Adil Zərbiyevə hökm oxunub.

"Report" xəbər verir ki, Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilən prosesdə Balaş Təhməzov və Adil Zərbiyevin barəsində Cinayət Məcəlləsinin 70-ci (şərti məhkum etmə) maddəsi tətbiq olunub. Hər iki təqsirləndirilən şəxsin barəsində 2 il sınaq müddəti olmaqla 6 il şərti cəza verilib.

Onların barəsində seçilmiş həbs qətimkan tədbiri dəyişdirilib və dərhal məhkəmə zalından azadlığa buraxılıblar.

Qeyd edək ki, Şirvan şəhər sakini Adil Zərbiyev Sabirabad rayonu və Şirvan şəhərinin bir qrup sakininə guya Əmək və Əhalinin Sosial Müdafiə Nazirliyində işləyən tanışları vasitəsilə əlillik dərəcəsi təyin etdirəcəyini vəd edib, aldadaraq 2019-cu ilin sonlarında onlara məxsus ümumilikdə 9 500 manat pul vəsaitini ələ keçirib və onları vəzifəli şəxsə rüşvət verməyə təhrik edib.

O həmçinin Lerik Rayon Mərkəzi Xəstəxanasında psixiatr-həkim vəzifəsində çalışan Balaş Təhməzovla cinayət əlaqəsinə girərək əlillik dərəcəsi təyin edilməsi ilə bağlı onlara müraciət etmiş şəxslərə guya yüksək vəzifədə olan tanışlarının köməkliyi ilə müxtəlif səhiyyə müəssisələrində stasionar müalicə almalarına dair saxta xəstəlik tarixçələri əldə edərək təqdim edəcəklərini və dayandırılmış əlillik dərəcələrinin bərpa edilməsinə köməklik göstərəcəklərini vəd edərək ayrı-ayrı vətəndaşlardan ümumilikdə 6 min manat məbləğində pul vəsaitini alaraq dələduzluq yolu ilə ələ keçirib, vətəndaşları rüşvət verməyə təhrik etməsinə əsaslı şübhələr müəyyənləşib.

Adil Zərbiyev və Balaş Təhməzova Cinayət Məcəlləsinin 178.2.1 (qabaqcadan əlbir olan bir qrup şəxs tərəfindən törədilən dələduzluq), 178.2.2 (təkrar dələduzluq), 32.4,312.2 (rüşvət verməyə təhrik etmə) 320.1-ci (rəsmi sənədləri saxtalaşdırma və istifadə etmə) və digər maddələri ilə ittiham elan edilib.