Ötən il məhkəmə hakimiyyətinə nə qədər vəsait ayrılıb?

2019-cu ildə müdafiə, məhkəmə hakimiyyəti, hüquq-mühafizə və prokurorluq bölmələri üzrə xərclər açıqlanıb.

“Report”un xəbərinə görə, Maliyyə Nazirliyinin açıqlamasında qeyd edilib ki, dövlət əsaslı vəsait qoyuluşu xərclərindən və dövlət büdcəsinin ehtiyat fondundan ayrılmış vəsaitlər də (187,6 milyon manat) nəzərə alınmaqla 2019-cu ildə müdafiə xərclərinə dövlət büdcəsi xərclərinin 13,7%-i qədər və yaxud 3,4 milyard manat vəsait yönəldilib. Bu da 2018-ci illə müqayisədə 20,7 milyon manat və yaxud 0,6% çoxdur.

Dövlət əsaslı vəsait qoyuluşu xərclərindən ayrılmış vəsait də (155,7 milyon manat) nəzərə alınmaqla, 2019-cu ildə məhkəmə hakimiyyəti, hüquq-mühafizə və prokurorluq bölməsi üzrə xərclərə dövlət büdcəsi xərclərinin 6,8%-i qədər (2018-ci illə müqayisədə 0,4 faiz-bənd çox) və ya 1,7 milyard manat vəsait yönəldilib ki, bu da 2018-ci illə müqayisədə 208,2 milyon manat və ya 14,3% çoxdur.