Bakıda daha bir “Suriya döyüşçüsü” hakim qarşısına çıxarılır

Suriyada silahlı birləşmələrin fəaliyyətində iştirak etməkdə təqsirləndirilən Elçin Qasımovun cinayət işi üzrə ibtidai istintaq başa çatıb.

“Report”un xəbərinə görə, cinayət işi baxılması üçün Bakı Ağır Cinayətlər Məhkəməsinə göndərilib.

Hakim İradə Hacızadənin icraatında olan iş üzrə hazırlıq iclasının vaxtı hələ açıqlanmayıb.

İttihama görə, 1986-cı il təvəllüdlü E.Qasımov terror qruplaşmalarının tərkibində Suriyanın Atma və digər şəhərlərində silahlı münaqişələrdə iştirak edib.

Ona Azərbaycan Respublikası Cinayət Məcəlləsinin 218.2 (cinayətkar birlikdə iştiraketmə) və 279.1-ci (qanunvericiliklə nəzərdə tutulmayan silahlı birləşmənin fəaliyyətində iştiraketmə) maddələri ilə ittiham verilib.