Azərbaycan gömrükçüləri külli miqdarda mobil telefon və aksesuar aşkar ediblər

Bakı. 8 sentyabr. REPORT.AZ/ Dövlət Gömrük Komitəsi (DGK) Tovuz Gömrük İdarəsinin əməkdaşları külli miqdarda mobil telefon və aksesuarların gömrük nəzarətindən gizlədilmiş şəkildə ölkə ərazisinə gətirilməsinə cəhdin qarşısını alıblar. 

Bu barədə “Report”a DGK-dan məlumat verilib.

Məlumata görə, idarənin "Sadıxlı" gömrük postunda Gürcüstandan Azərbaycana gələn ölkə vətəndaşı Vüqar Yusifovun idarə etdiyi "Mercedes-Benz 180" markalı, 90 FZ 536 dövlət nömrə nişanlı avtomobilə gömrük nəzarəti həyata keçirilib. Baxış zamanı, həmin nəqliyyat vasitəsinin sağ və sol karniz bölməsinin kəsilməsi ilə xüsusi düzəldilmiş yerlərində gizlədilən - 28 ədəd "Sunlean model S2", 49 ədəd "Xinova T210" markalı mobil telefonlar və mobil telefona aid 98 ədəd adapter, eləcə də arxa oturacağın arxasında gizlədilən 92 ədəd mobil telefon qutusu aşkar olunub.

Faktla bağlı araşdırma aparılır.