"Yuventus" "Everton"un futbolçusunu icarəyə götürməyi planlaşdırır

İtaliyanın "Yuventus" klubu "Everton"un (İngiltərə) hücumçusu Betunu heyətinə qatmaqda maraqlıdır.

"Report" "La Gazzetta dello Sport"a istinadən xəbər verir ki, Turin təmsilçisi 27 yaşlı futbolçunu bu ay icarəyə götürməyi planlaşdırır.

Razılaşmaya mövsümün sonunda Qvineya-Bisau əsilli oyunçunun transfer hüquqlarını birdəfəlik almaq bəndi də daxil edilə bilər. Artıq vasitəçilər bu keçid üzərində işə başlayıblar. Betu ilə həmçinin Türkiyənin "Fənərbağça" klubu da yaxından maraqlanır və ötən həftə tərəflər arasında görüş keçirilib.

Qeyd edək ki, cari mövsümdə 26 matçda 3 qol vuran hücumçunun "Everton"la müqaviləsinin müddəti 2027-ci ilin iyununa qədərdir. "Transfermarkt" portalı onun dəyərini 20 milyon avro məbləğində qiymətləndirir.