Luka Modriç Çempionlar Liqasının final oyunu barədə danışıb

İspaniyanın "Real" (Madrid) klubunun futbolçusu Luka Modriç UEFA Çempionlar Liqasının final görüşündə üz-üzə gələcəkləri Almaniya təmsilçisi "Borussiya" (Dortmund) ilə matç barədə fikirlərini bölüşüb.

"Report" AS nəşrinə istinadən xəbər verir ki, xorvatiyalı yarımmüdafiəçi hər iki komandanın şanslarının eyni olduğunu bildirib: "Hər kəs bizi oyunun favoriti hesab edir. Düşünürəm ki, bu belə deyil. "Borussiya" cari mövsümü çox yüksək səviyyədə keçirib və onlar bizə finalda çətinlik yarada bilərlər. Şansları 50-nin 50-yə hesab edirəm. Bununla belə, diqqətli oyun sərgiləyib, görüşün qalibi olmaq istəyirik".

Qeyd edək ki, İngiltərənin London şəhərindəki "Uembli" stadionunda keçiriləcək final matçı iyunun 1-də, saat 23:00-da start götürəcək.