Dünya çempionu Peti bütün medallarını itirib

Fransa milli komandası ilə futbol üzrə DÇ-1998-in qalibi olan Emmanuel Peti, dünya və Avropa çempionatlarında qazandığı medallar da daxil olmaqla, bütün medallarını itirib.

"Report" xəbər verir ki, o, bu barədə "Talk Sport" podkastında danışıb.

"Dünya Kubokunun surətini götürüb seyfə qoydum. Medallarla da eyni şeyi etmək istədim. Onları axtarmağa saatlarla vaxt sərf etdim. Dəli olurdum. İngiltərə və Fransa çempionatlarından, kuboklardan, dünya və Avropa çempionatlarından medallar... Hər şey yoxa çıxmışdı", - deyə o əlavə edib.

Qeyd edək ki, 55 yaşlı Peti həmçinin 2000-ci ildə Fransa millisi ilə Avropa çempionu olub. O, "Monako" ilə Fransa çempionluğunu (1997) və Fransa Kubokunu (1991) da qazanıb.