Azərbaycan yığması Qazaxıstanla heç-heçə edib

Bakı. 11 yanvar. REPORT.AZ/ Azərbaycanın 1999-cu il təvəllüdlü futbolçulardan ibarət yığması bu gün FIFA-nın I vitse-prezidenti Valentin Qranatkinin xatirəsinə həsr olunmuş XXIX ənənəvi beynəlxalq turnirdə növbəti oyununu keçirib. 

"Report"un məlumatına görə, rəqib Qazaxıstanın müvafiq yaş qrupuna aid komandası olub.

Qarşılaşma 2:2 hesablı heç-heçə ilə nəticələnib. Təbriz Həsənovun rəhbərlik etdiyi komandanın heyətində 45-ci dəqiqədə Rafael Məhərrəmli, 82-ci dəqiqədə isə Fərid Nəbiyev fərqlənib. Rəqib komandanın qollarını isə 18-ci dəqiqədə penaltidən Dinmuxammed Kaşken və 53-cü dəqiqədə Yerkebulan Seyidaxmet vurub. Azərbaycan millisinin heyətində ən yaxşı futbolçu adına Fərid Nəbiyev layiq görülüb. 

Bu nəticədən sonra Azərbaycan yığması C qrupunda 1 xalla sonuncu pillədə qalıb. Qazaxıstan isə hələlik 2 xalla 2-ci pillədədir. 

İlk oyunda Litvaya 1:2 hesabı ilə məğlub olan Azərbaycan millisi yanvarın 13-də Slovakiyaya qalib gələ bilməsə, medallar uğrunda mübarizə şanslarını itirəcək.

Valentin Qranatkin turniri, qrup mərhələsi, II tur

C qrupu

11 yanvar

13:00. Azərbaycan - Qazaxıstan - 2:2

Qol: Rafael Məhərrəmli, 45. Fərid Nəbiyev, 82 - Dinmuxamed Kaşken, 18. Seyidahmet Yerkebulan, 53

Baş hakim: Vasiliy Tixonov

Yan xətt hakimləri: Andrey Runov, Sergey Yadrov

Sankt-Peterburq. Peterburqski İdman-Konsert Kompleksi

Qeyd edək ki, 4 qrupda ilk 2 yeri tutanlar 1/4 finala yüksələcəklər. Sonrakı 2 pillənin sahibləri isə 9 - 16-cı yerlər uğrunda mübarizə aparacaqlar.