AVRO-2020-nin püşkatma mərasimində Azərbaycan geniş heyətlə təmsil olunacaq

Bakı. 30 noyabr. REPORT.AZ/ Dekabrın 2-də İrlandiyanın paytaxtı Dublindəki Konvensiya Mərkəzində 2020-ci il Avropa çempionatının seçmə mərhələsinin püşkatma mərasimi keçiriləcək. 

"Report"un milli assosiasiyanın rəsmi saytına istinadən verdiyi məlumata görə, tədbirdə AFFA geniş heyətlə təmsil olunacaq.

Bakı vaxtı ilə saat 15:00-da başlanacaq mərasimə AFFA-nın prezidenti Rövnəq Abdullayev, vitse-prezident Elşad Nəsirov, baş katib Elxan Məmmədov, Azərbaycan milli komandasının baş məşqçisi Qurban Qurbanov, baş katibin müavini Sərxan Hacıyev, AFFA-nın Mətbuat və ictimaiyyətlə əlaqələr şöbəsinin müdiri Firuz Abdulla, AFFA-nın Beynəlxalq əlaqələr şöbəsinin müdiri, Avro-2020-nin final mərhələsinin Bakıda keçiriləcək oyunları üzrə Əməliyyat Qrupunun layihə koordinatoru Könül Mehtiyeva və AFFA-nın İnfrastruktur direktoru, Avro-2019-un Bakıda təşkil olunacaq final qarşılaşmasının layihə koordinatorunun müavini Kamran Vəliyev qatılacaq.

Qeyd edək ki, AVRO-2020-nin 4 qarşılaşması Bakı Olimpiya Stadionunda keçiriləcək. Bunlardan 3-ü qrup oyunları, 1-i isə 1/4 final mərhələsinin qarşılaşmasıdır. Püşkatma mərasimində AFFA nümayəndə heyətinin üzvləri çempionatla bağlı müxtəlif tədbirlərin iştirakçısı olacaqlar. Həmçinin püşkatmadan bir gün öncə - dekabrın 1-də Dublində milli assosiasiyaların rəhbərliyi və mətbuat xidməti rəhbərləri üçün seminarlar keçiriləcək. Tədbirlərdə, müvafiq olaraq, E.Məmmədov, S.Hacıyev və F.Abdulla iştirak edəcək.