Azərbaycan üzgüçüləri Rusiyada keçirilən yarışda 9 medal qazanıblar

Azərbaycan Dövlət Bədən Tərbiyəsi və İdman Akademiyasının (ASAPES) tələbələri Rusiyanın Kazan şəhərində universitetlər arasında keçirilən üzgüçülük üzrə “Rektor Kuboku” turnirində 9 medal qazanıblar.

"Report" xəbər verir ki, bu barədə Azərbaycan Üzgüçülük Federasiyası məlumat yayıb.

Təmsilçilərimizin qazancı 2 qızıl, 4 gümüş və 3 bürünc medal olub.

Əbdürrəhman Rüstəmov 200 m ve 50 m batterflyay üsulunda qızıl, 100 m batterflyay, 200 m qarışıq və 200 m sərbəst üsulda gümüş medala sahib çıxıb.

Rəşad Alquliyev 200 m qarışıq üsulda bürünc medalla kifayətlənib. Qadınların yarışında Fatimə Alkərəmova 200 m sərbəst üsulda ikinci, 100 m sərbəst və 200 m qarışıq üsulda üçüncü yeri tutub.

Həftəsonu 50 metrlik “Burevestnik” üzgüçülük hovuzunda Rusiyanın 32 regionundan 1084 idmançı və Azərbaycandan olan komanda, o cümlədən 15 universitet təmsilçiləri mükafatlar uğrunda mübarizə aparıblar.

Qeyd edək ki, idmançılarımızın kubokda iştirakı ASAPES ilə Kazanda yerləşən Povoljski Dövlət Bədən Tərbiyəsi, İdman və Turizm Universiteti arasında imzalanmış qarşılıqlı əməkdaşlıq memorandumuna əsasən təmin olunub.