Azərbaycan boksçuları "Adriatik incisi" turnirini dörd medalla başa vurublar

Azərbaycan təmsilçiləri Rza Rzayev (70 kq), Heydər Əzməmmədov (85 kq), Vüsal Xəlilov (65 kq) və Zaur Səmədov (90 kq) Monteneqronun Budva şəhərində gənc boksçular arasında keçirilən Dünya Kuboku statuslu "Adriatik incisi" beynəlxalq turnirin medalla başa vurublar.

"Report"un məlumatına görə, Azərbaycan millisi 18 ölkənin qatıldığı yarışda 1 qızıl, 1 gümüş və 2 bürünc medal qazanıb.

Rza Rzayev (70 kq) bütün rəqiblərinə qalib gəlib. O, finalda Maksim Kirillovu 4:1 (30:27, 28:29, 29:28, 29:28, 29:28) hesabı məğlub edərək fəxri kürsünün ən yüksək pilləsinə qalxıb.

Heydər Əzməmmədov (85 kq) gümüş, Vüsal Xəlilov (65 kq) və Zaur Səmədov (90 kq) bürünc medala yiyələniblər.

Azərbaycan millisi bu göstərici ilə komanda hesabında 3-cü yeri tutub.