Yanvarda SOCAR neft ixracını 2,2 dəfə artırıb

Ötən ay Azərbaycan Dövlət Neft Şirkəti (SOCAR) neft ixracını 166 min ton və ya 2,24 dəfə artıraraq 300 min tona çatdırıb.

“Report” xəbər verir ki, bu barədə Energetika Nazirliyinin 2024-cü ilin yanvar ayı üzrə açıqladığı operativ məlumatlarında deyilir.

Hesabat dövründə ümumilikdə Azərbaycandan xarici ölkələrə 2,1 milyon ton neft (kondensatla birlikdə) ixrac olunub. Bu, 2023-cü ilin yanvar ayı ilə müqayisədə eyni səviyyədə qalıb. Bunun 1,8 milyon tonu Azərbaycan Beynəlxalq Əməliyyat Şirkəti (ABƏŞ) tərəfindən ixrac olunub. Bu göstərici illik müqayisədə 0,2 milyon ton və ya 10 % azalıb.

Qeyd edək ki, Azərbaycan sahillərindən təxminən 100 km aralıqda yerləşən “Azəri-Çıraq-Günəşli” yataqlar blokundan ilk neft 1997-ci ildə hasil olunub.

Yataqlar blokunun işlənməsi üzrə hasilat bölgüsünə dair ilk müqavilə 1994-cü ilin 20 sentyabr tarixində imzalanıb. 2017-ci ilin 14 sentyabr tarixində isə həmin yataqların birgə istismarına və hasilatın pay bölgüsünə dair yeni saziş imzalanıb. Bu saziş yataqların 2049-cu ilin sonunadək işlənməsini nəzərdə tutur.

AÇG-də BP (30,37 %), SOCAR (25 %), “MOL Group” (9,57 %), INPEX (9,31 %), “Equinor” (7,27 %), “ExxonMobil” (6,79 %), TPAO (5,73 %), ITOCHU (3,65 %), “ONGC Videsh Limited” (OVL) (2,31 %) pay sahibidir.