Yanvarda Azərbaycan Türkiyəyə qaz nəqlini 11 %-dək artırıb

Bu ilin yanvar ayında Azərbaycan Türkiyəyə 881,85 milyon kubmetr təbii qaz ixrac edib.

“Report” xəbər verir ki, bu barədə Türkiyənin Enerji Bazarını Tənzimləmə Qurumunun (Enerji Piyasası Düzenleme Kurumu – EPDK) hesabatında qeyd olunub.

Məlumata görə, bu, 2022-ci ilin yanvar ayı ilə müqayisədə 10,74 % çoxdur.

Bununla da yanvarda Azərbaycan Türkiyəyə təbii qaz ixrac edən ikinci ölkə olub. Türkiyənin ümumilkdə idxal etdiyi təbii qazın 14,58 %- Azərbaycanın payına düşüb.

Xatırladaq ki, ötən ilin yanvar ayında Türkiyə Azərbaycandan 796,32 milyon kubmetr təbii qaz idxal edib.

Ümumilikdə isə yanvarda Türkiyə ümumilikdə 6 milyard 048,23 milyon kubmetr həcmində təbii qaz idxal edib ki, bu da 2022-ci ilin eyni ayının göstəricisi ilə müqayisədə 9,79 % azdır.

Yanvarda Rusiya Türkiyəyə qaz ixracına görə lider olub. İlin ilk ayında Rusiyadan Türkiyəyə 2 milyard 144,03 milyon kubmetr təbii qaz ixrac olunub. Bu, 2022-ci ilin yanvar ayı ilə müqayisədə 18,13 % azdır.

Yanvarda üçüncü yerdə ABŞ qərarlaşıb. Bu ölkə yanvarda Türkiyəyə 733,54 milyon kubmetr qaz nəql edib. Bu, 2022-ci ilin yanvar ayı ilə müqayisədə 39,14 % azdır.

Qeyd edək ki, Türkiyəyə Azərbaycanın “Şahdəniz” yatağından hasil edilən təbii qaz nəql edilir. Təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və Trans-Anadolu Təbii Qaz Kəməri (TANAP) vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb.