Türkiyə İrandan noyabrda neft almayıb

Bakı. 4 dekabr. REPORT.AZ/ ABŞ-ın İrandan neft idxalına müvəqqəti olaraq güzəşt tətbiq etdiyi ölkələr arasında yer almasına baxmayaraq, Türkiyə noyabr ayında İrandan neft almayıb.

“Report” Türkiyə KİV-inə istinadən xəbər verir ki, bir mənbənin məlumatına görə, Tüpraş oktyabr ayında İrandan gündəlik 129 min barel neft alsa da, noyabr ayında bu rəqəmi sıfıra endirib.

Mənbənin məlumatına görə, İrandan Türkiyəyə çatdırılan neft, adətən, iki və ya daha çox həftə əvvəldən rezerv edilir.

Digər mənbə isə oktyabr ayının ortalarından noyabr ayının ortalarına kimi Tüpraşın İzmitdəki zavodunda planlaşdırılmış təmir işləri aparıldığını bildirib və qeyd edib ki, neftə tələbatın bu müddətdə azalması bununla bağlı ola bilər.