“SOCAR Polymer”in ixrac gəlirləri açıqlanıb

2024-cü ildə Azərbaycan Dövlət Neft Şirkətinin (SOCAR) 57 %-lik törəməsi olan “SOCAR Polymer” MMC 237,6 milyon ABŞ dolları dəyərində məhsul ixrac edib.

“Report”un məlumatına görə, bu barədə İqtisadi İslahatların Təhlili və Kommunikasiya Mərkəzinin “İxrac İcmalı”nın yanvar sayında bildirilir.

Bu, 2023-cü ilin göstəricisi ilə müqayisədə 59,1 milyon ABŞ dolları və yaxud 19,9 % azdır.

Qeyd edək ki, 2024-cü ildə Azərbaycanın qeyri-neft-qaz ixracı 2023-cü ilin müvafiq dövrü ilə müqayisədə 0,3 % artaraq 3,4 milyard ABŞ dolları təşkil edib. 2024-cü ildə yeyinti məhsullarının ixracı 11,3 % artaraq 1,03 milyard ABŞ dollarına bərabər olub.