Natiq Əliyev: “Regionda enerji təhlükəsizliyinin təminatı Türkiyə və Azərbaycanın birgə iştirakı olmadan mümkün deyil ”

Bakı. 13 dekabr. REPORT.AZ/ Türkiyənin Azərbaycana yeni təyin olunmuş səfiri Erkan Özoral Energetika Nazirliyində olub və nazir Natiq Əliyevlə görüşüb. 

Bu barədə "Report"a nazirlikdən bildirilib. 

Məlumata görə, N.Əliyev Türkiyənin İstanbul şəhərində xeyli sayda insanın həlak olması və yaralanması ilə nəticələnmiş terror aktına görə kədərləndiyini, həlak olanların ailələrinə, yaxınlarına, qardaş Türkiyə xalqına dərin hüznlə başsağlığı dilədiyini və Azərbaycanın həmişə Türkiyənin yanında olduğunu bildirib. İki ölkə arasındakı əlaqələrin dostluq və qardaşlıq münasibətlərinə əsaslandığını vurğulayan nazir deyib ki, bütün sahələrdə əməkdaşlıq yüksək səviyyədədir: “Təməli qədim tarixə əsaslanan Azərbaycan-Türkiyə birliyi iki ölkənin dövlət başçılarının əməyi sayəsində yüksələn xətt üzrə davam etdirilir”. 

Enerji sahəsində Azərbaycan-Türkiyə əməkdaşlığının nailiyyətlərindən bəhs edən N.Əliyev qeyd edib ki, Azərbaycan bir çox enerji layihələrini Türkiyənin maraqlarını nəzərə almaqla, bu ölkə ilə birgə icra edib. Onun sözlərinə görə, Azərbaycanın Türkiyə ilə müştərək reallaşdırdığı Bakı-Tbilisi-Ceyhan neft və Bakı-Tbilisi-Ərzurum qaz kəmərləri və Cənub Qaz Dəhlizinin əsas seqmentlərindən olan TANAP (Trans Trans-Anadolu qaz boru kəməri) layihəsi bir daha sübut edir ki, regionda enerji təhlükəsizliyinin təminatı hər iki ölkəninin birgə iştirakı olmadan mümkün deyil. 

N.Əliyev Türkiyə hökumətinin TANAP-ın vaxtında icra edilməsi ilə bağlı dəstəyini yüksək qiymətləndirərək, Cənub Qaz Dəhlizi Məşvərət Şurasının III iclasının keçirilməsini zəruri edən amillər və Türkiyənin enerji və təbii ehtiyatlar naziri Berat Albayrakın bu tədbirə qatılaraq, layihənin həyata keçirilməsində rol oynayan ölkələrin energetika nazirləri ilə birgə müzakirəsinin əhəmiyyətini diqqətə çatdırıb. 

Türkiyəli diplomat isə Azərbaycanda səfir kimi fəaliyyətə başlamasından məmnun olduğunu, Azərbaycan-Türkiyə ikitərəfli münasibətlərininin gələcək inkişafı üçün səylərini əsirgəməyəcəyini bəyan edib. Səfir hər iki ölkənin bir-birindən güc aldığını və çətinliklərə qarşı əzmlə dayandıqlarını deyib. O bildirib ki, səfir kimi fəaliyyət göstərdiyi müddətdə əsas məqsədi bütün sahələrdə, xüsusilə enerji sahəsində əməkdaşlıq əlaqələrinin inkişafına nail olmaqdan ibarətdir. 

Səfirin sözlərinə görə, Türkiyə TANAP layihəsinin icrasını vaxtından əvvəl yekunlaşdırmağa çalışmaqla yanaşı, enerji əməkdaşlığını daha da dərinləşdirməyi düşünür. O, Azərbaycanın Türkiyədə ən böyük xarici sərmayədar olmasından qürur duyduğunu deyərək, ölkəsinin Azərbaycanın qədəm qoyduğu yeni iqtisadi inkişaf mərhələsində yaxından iştirakda maraqlı olduğunu da ifadə edib. 

N.Əliyev bir daha səfirə gələcək fəaliyyətində uğurlar arzulayıb və Energetika Nazirliyi tərəfindən ona hər zaman bu sahədə lazımi köməyin göstəriləcəyini bildirib.