"OPEC+" 2026-cı il üçün neft hasilatını sabit saxlamaq barədə qərar qəbul edib - YENİLƏNİB

"OPEC+" ölkələri görüşdə 2026-cı ilin birinci rübündə neft hasilatının artırılmasının dayandırılması barədə qərarı qüvvədə saxlayıb və bu dövr üçün neft hasilatı kvotalarını 2025-ci ilin dekabr səviyyəsində qoruyub.

"Report"un məlumatına görə, bu barədə OPEC saytında yerləşdirilən "OPEC+" nazirlər görüşünün yekun bəyanatında qeyd olunub.

Nümayəndələr həmçinin OPEC katibliyi tərəfindən hazırlanmış mexanizmi razılaşdırıblar. Bu mexanizm iştirakçı ölkələrin maksimal hasilat imkanlarını müəyyən etmək üçün istifadə olunacaq və onun əsasında 2027-ci il üçün əsas hasilat səviyyələri müəyyən ediləcək.

Növbəti "OPEC+" nazirlər görüşü 7 iyun 2026-cı il tarixində keçiriləcək.

17:08

"OPEC+" bazar günü keçiriləcək iclasında neft hasilatını dəyişməz saxlayacaq.

"Report"un məlumatına görə, bu barədə "Reuters"ə qurumdakı mənbələr bildiriblər.

İstehsalçılar hələ də 2026-cı ilin birinci rübündə tədarük bolluğunun yüksələn əlamətləri fonunda tədarük artımını dayandırmaq niyyətindədirlər və bu, ehtimal ki, qiymətlərə əlavə təzyiq göstərəcək.

Bu arada Bloomberg qeyd edir ki, Səudiyyə Ərəbistanı və Rusiyanın başçılıq etdiyi koalisiya dekabr ayında hasilatı bir qədər artırmaq planlarına sadiq qalacaq və sonra gələn ilin ilk üç ayı üçün hazırkı səviyyədə saxlayacaq.

Üç aylıq hasilatın dondurulması "OPEC+"a da bir müddət vaxt verəcək, eyni zamanda təşkilat tədarük üçün artan geosiyasi riskləri qiymətləndirəcək. Agentlik qeyd edir ki, qeyri-sabitliyin təzahürü Qara dəniz sahillərində Rusiya neftini daşıyan iki tankerə hücum olub.