Fransa Rusiyadan qaz idxalına Aİ-nin embarqo tətbiq etmək ehtimalını qiymətləndirib

Fransa hökumətinin rəsmi nümayəndəsi Qabriel Attal Rusiyadan Avropa İttifaqı (Aİ) ölkələrinə neft və qaz idxalına embarqonun tətbiq olunacağını istisna etməyib.

“Report” xəbər verir ki, o, bu barədə “France Info” telekanalına bildirib.

“Belə bir imkan mövcuddur. Hər zaman sanksiyaları mümkün qədər uzağa aparmağa hazır olduğumuzu bildirmişik”, - Q. Attal embarqonun mümkün tətbiqi ilə bağlı sualı cavablandırarkən bildirib.

Xatırladaq ki, daha əvvəl Fransa Xarici İşlər Nazirliyinin Avropa məsələləri üzrə dövlət katibi Kleman Bon yaxın günlərdə Aİ ölkələrinin ABŞ-la birlikdə Rusiyaya qarşı sanksiyaları sərtləşdirmək niyyətində olduqlarını bəyan etmişdi.