Bu ilin I rübündə Azərbaycanın ixrac etdiyi neftin həcmi açıqlanıb

Bu ilin birinci rübü ərzində Azərbaycandan xarici ölkələrə 5,7 milyon ton neft (kondensatla birlikdə) ixrac olunub.

“Report” xəbər verir ki, bu barədə Energetika Nazirliyinin bu ilin yanvar-mart ayları üzrə açıqladığı operativ məlumatlarında deyilir.

Bildirilir ki, bu, 2024-cü ilin yanvar-mart ayları ilə müqayisədə 0,3 milyon ton və ya 5 % azdır.

Bu ilin ilk üç ayında Azərbaycan Dövlət Neft Şirkətinin (SOCAR) neft ixracı 0,7 milyon ton təşkil edib.

Bildirilir ki, bu, 2024-cü ilin birinci rübünün göstəriciləri ilə müqayisədə 0,1 milyon və ya 12,5 % azdır.

2025-ci ilin yanvar-mart aylarında konsorsium 4,9 milyon tonu neft ixrac edib. Bu, 2024-cü ilin eyni ayları ilə müqayisədə 0,3 milyon ton və ya 5,8 % azdır.

Bu ilin birinci rübündə hasil edilən neftin 0,14 milyon tonu isə “Abşeron” yatağının payına düşüb.

Yeri gəlmişkən, “Azəri-Çıraq-Günəşli” və “Şahdəniz” yataqları istismara veriləndən aprel 1-nədək təqribən 653,2 milyon ton neft və 174,8 milyard kubmetr qaz ixraca nəql edilib.

Qeyd edək ki, Azərbaycan sahillərindən təxminən 100 km aralıqda yerləşən “Azəri-Çıraq-Günəşli” yataqlar blokundan ilk neft 1997-ci ildə hasil olunub.

Yataqlar blokunun işlənməsi üzrə hasilat bölgüsünə dair ilk müqavilə 1994-cü ilin 20 sentyabr tarixində imzalanıb. 2017-ci ilin 14 sentyabr tarixində isə həmin yataqların birgə istismarına və hasilatın pay bölgüsünə dair yeni saziş imzalanıb. Bu saziş yataqların 2049-cu ilin sonunadək işlənməsini nəzərdə tutur.