Bu il “Bahar” yatağından qaz hasilatının 6 % artacağı proqnozlaşdırılır

Bu il Xəzər dənizinin Azərbaycan sektorunda yerləşən “Bahar” yatağından 0,19 milyon barel neftin hasil ediləcəyi proqnozlaşdırılır.

“Report”un məlumatına görə, bu barədə Hesablama Palatasının Azərbaycan Dövlət Neft Fondunun (ARDNF) 2025-ci il üzrə büdcəsinə verdiyi rəydə deyilir.

Bu, 2024-cü ilin proqnozu ilə müqayisədə eynidir. 2023-cü ilin faktiki göstəricisi ilə müqayisədə isə 0,01 milyon barel və ya 5 % azdır.

Bu il “Bahar” yatağından 190,53 milyon kubmetr qaz hasil edilməsi gözlənilir ki, bu da 2024-cü ilin proqnozu ilə müqayisədə 11,03 milyon kubmetr və ya 6,1 % çoxdur. 2023-cü ilin faktiki göstəricisi ilə müqayisədə isə “Bahar” yatağından qaz hasilatı 15,14 milyon kubmetr və ya 8,6 % çoxdur.

Qeyd edək ki, Azərbaycan Dövlət Neft Şirkəti (SOCAR) və “Bahar Energy Limited” şirkəti 22 dekabr 2009-cu ildə "Bahar" və "Qum-dəniz" yataqlar bloku üzrə kəşfiyyat, reabilitasiya, işlənmə və hasilatın pay bölgüsü haqqında Saziş imzalayıblar.

“Bahar Energy Limited”in layihədəki payı 80 %, SOCAR-ın payı isə 20 % təşkil edir. Müqavilə 25 il müddətinə nəzərdə tutulub və daha 5 il müddətinə uzadılma imkanı var. İnvestisiya proqramı ilkin olaraq 1 milyard ABŞ dollar həcmində qiymətləndirilir. Bütün investisiya həcmini “Bahar Energy Limited” şirkəti qoyacaq. Müqavilə blokunda qazın qalıq ehtiyatları 25 milyard kubmetr təşkil edir.

“Qum-dəniz” neft yatağı 1955-ci ildə istismara verilib və Bakıdan cənub-şərqə doğru 21 km məsafədə yerləşir. "Bahar" qaz yatağı isə 1969-cu ildə istifadəyə verilib.