Azərbaycan Britaniya ilə yaşıl enerji dəhlizləri üzrə əməkdaşlığı müzakirə edib - YENİLƏNİB

Azərbaycan və Böyük Britaniya arasında yaşıl enerji dəhlizləri və interkonnektorlar üzrə əməkdaşlığın genişləndirilməsi müzakirə edilib.

"Report" Energetika Nazirliyinə istinadən xəbər verir ki, bununla bağlı müzakirələr nazir Pərviz Şahbazovun Böyük Britaniya və Şimali İrlandiya Birləşmiş Krallığının ölkəmizdəki fövqəladə və səlahiyyətli səfiri Dankan Normanla görüşündə aparılıb.

Görüşdə Azərbaycan - Böyük Britaniya münasibətlərinin inkişafı, enerji tərəfdaşlığının neft-qaz sektorundan təmiz enerji, dekarbonizasiya və elektrik enerjisi bağlantılarına qədər genişlənməsi məmnunluqla qeyd edilib.

Cəbrayılda BP ilə həyata keçirilən günəş enerjisi layihəsi və neft-qaz infrastrukturunun elektrikləşdirilməsi enerji tərəfdaşlığının yeni mərhələsinin mühüm nümunələri kimi dəyərləndirilib.

Görüşdə "Xəzər-Qara dəniz-Avropa Yaşıl Enerji Dəhlizi" layihəsinin inkişafı, texniki-iqtisadi əsaslandırmanın nəticələri, layihəyə beynəlxalq maraq barədə məlumat verilib. Layihənin növbəti mərhələləri üzrə ekspert səviyyəsində müzakirələrin davam etdirilməsi və Britaniya şirkətlərinin bu prosesdə iştirak imkanları nəzərdən keçirilib.

Təmiz enerjiyə keçid sahəsində əməkdaşlıq haqqında Anlaşma Memorandumu çərçivəsində görülən işlər, qarşılıqlı səfərlər və məlumat mübadiləsinin nəticələri müsbət qiymətləndirilib.

Həmçinin Hökumətlərarası Komissiyanın 8-ci iclasına hazırlıq, müzakirə olunacaq məsələlər və müxtəlif sahələr üzrə imzalanması planlaşdırılan sənədlər barədə fikir mübadiləsi aparılıb. Enerji, ticarət və investisiya sahələrində Azərbaycan-Böyük Britaniya tərəfdaşlığının yeni layihələrlə daha da genişləndirilməsi üçün qarşılıqlı fəaliyyətin davam etdirilməsi razılaşdırılıb.

13:25

Azərbaycan və Böyük Britaniya arasında yaşıl enerji dəhlizləri və interkonnektor layihələrində bu ölkənin iştirakı ilə bağlı fikir mübadiləsi aparılıb.

"Report" xəbər verir ki, bunu energetika naziri Pərviz Şahbazov "X" sosial şəbəkəsindəki hesabında bildirib.

Bu barədə müzakirələr P. Şahbazovun Böyük Britaniya və Şimali İrlandiya Birləşmiş Krallığının ölkəmizdəki fövqəladə və səlahiyyətli səfiri Dankan Normanla görüşündə aparılıb.

Nazir bildirib ki, səfir Dankan Normanla görüşdə enerji tərəfdaşlığınını yeni istiqamətləri müzakirə edilib: "BP ilə enerji tərəfdaşlığımızın yeni layihələrlə genişləndirilməsi, təmiz enerjiyə keçid, yaşıl enerji dəhlizləri və interkonnektorlar üzrə əməkdaşlıq, Britaniya şirkətlərinin bu layihələrdə iştirakı, eləcə də Hökumətlərarası Komissiyanın qarşıdakı iclası ilə bağlı fikir mübadiləsi apardıq".