BMTM: Azərbaycan Avrasiyanın əsas enerji qovşağına çevrilir

Azərbaycan, yeni geosiyasi şəraitdə enerji resurslarının əsas təsir vasitəsinə çevrildiyini nəzərə alaraq, Avrasiyanın əsas enerji qovşağı statusunu sürətlə möhkəmləndirir.

"Report"un məlumatına görə, bu barədə Beynəlxalq Münasibətlərin Təhlili Mərkəzinin (BMTM) şöbə müdiri Şahmar Hacıyev Bakıda keçirilən Azərbaycan-ABŞ Beyin Mərkəzlərinin I Forumunda bildirib.

Ekspert vurğulayıb ki, bu xüsusilə Rusiya-Ukrayna münaqişəsi fonunda hiss olunur: "Enerji təhlükəsizliyi faktiki olaraq milli təhlükəsizliyin bir hissəsinə çevrilib. Azərbaycan Türkiyə və Avropa ilə birlikdə Cənub Qaz Dəhlizi də daxil olmaqla bir sıra strateji layihələr həyata keçirib".

Onun sözlərinə görə, enerji və nəqliyyat marşrutları Avrasiya üçün mühüm əhəmiyyət kəsb edir: "Çünki onlar Avropanın bir təchizatçıdan asılılığını azaltmağa, Mərkəzi Asiya və Xəzər regionunun resurslarını Avropa bazarları ilə birləşdirməyə, ölkələr arasında siyasi və iqtisadi əlaqələri möhkəmləndirməyə imkan verir".

Ekspert vurğulayıb ki, Azərbaycan Xəzər, Mərkəzi Asiya və Avropa arasında yeni "yaşıl dəhliz"lər formalaşdıraraq əsas əlaqələndirici mərkəz kimi çıxış edir.

Ş.Hacıyev, həmçinin "C6+1" platforması da daxil olmaqla çoxtərəfli əməkdaşlıq formatlarının perspektivliyini qeyd edib ki, burada iştirak Azərbaycan üçün yeni iqtisadi imkanlar və Avropa bazarlarına genişləndirilmiş giriş təmin edəcək.