Proqram direktoru: Fənlərarası əməkdaşlıq Qarabağda real həyat təcrübələri vasitəsilə öyrədilir

Qarabağ Universitetində fənlərarası əməkdaşlıq real həyat təcrübələri vasitəsilə öyrədilir.

Bunu "Report"un Xankəndiyə ezam olunan əməkdaşına açıqlamasında Qarabağ Universiteti Tibb bacılığı/qardaşlığı üzrə proqram direktoru Gülşah Ünsal-Cəfərov deyib.

O, Qarabağ Universitetinin tibb bacısı şöbəsində tədrisin ənənəvi təhsili üstələdiyini bildirib:

"Proqramımız peşələrarası təhsil və icma prinsiplərinə əsaslanır. Bu da dünyada bir ilk sayılır. Konkretləşdirsək, bu o deməkdir ki, tələbələrimiz həkimlər və tibb bacıları ilə ünsiyyət və real həyat təcrübələri ilə tanışlıq şəraitində öz ixtisaslarını öyrənəcəklər".

Direktor qeyd edib ki, universitetdə tibb bacısı-qardaşı ixtisasının tədrisi olmaq həm də insanlığa, sağlamlığa və gələcəyə xidmət anlamındadır:

"Qarabağın dirçəlişi fonunda yetişdirdiyimiz tibb bacı və qardaşları elm, bacarıq və empati ilə təchiz edilmiş gənclərdir. Burada tədris kitablarla məhdudlaşmır. Biz fənlərarası əməkdaşlığı Qarabağda real həyat təcrübələri vasitəsilə öyrənirik".