Zelenski Kişinyovda Uitkoff və Kuşnerlə danışıqlar aparıb

Ukrayna Prezidenti Volodimir Zelenski Kişinyov Beynəlxalq Hava Limanında ABŞ liderinin xüsusi elçisi Stiv Uitkoff və kürəkəni Cared Kuşnerlə söhbət etdiyini bildirib.

"Report" xəbər verir ki, bu barədə Ukrayna Prezidenti özünün "Telegram" kanalında yazıb.

Onun sözlərinə görə, söhbət "çox müsbət" keçib.

"Rusiyanın Ukraynaya qarşı müharibəsinə son qoymaq istiqamətində diplomatiyaya təkan vermək üçün elə bu həftələrdə maksimum aktiv işləməyə hazır olduqlarına görə minnətdaram. Bütün dünyanın diqqətinin İran ətrafındakı vəziyyətə yönəldiyini anlayırıq, lakin Avropada sülhlə bağlı ümumi məqsədimiz aktualdır", - Zelenski qeyd edib.

O həmçinin əlavə edib ki, "Moskvada nəyə kökləndikləri" ilə bağlı Kiyevin malik olduğu məlumatlar barədə həmsöhbətlərini məlumatlandırıb.