Zelenski ilk dəfə Serbiyaya səfər edəcək

Ukrayna Prezidenti Volodimir Zelenski ilk dəfə Serbiyaya rəsmi səfər edəcək və Prezident Aleksandar Vuçiçlə görüşəcək.

"Report"un Serbiya Prezidenti Dəftərxanasına istinadən məlumatına görə, liderlər 8 avqustda Belqradda görüşəcəklər.

Bu, Zelenskinin Ukrayna Prezidenti vəzifəsinə başladıqdan sonra Serbiyaya ilk rəsmi səfəri olacaq. Dövlət başçıları əvvəllər beynəlxalq forumlarda və sammitlərdə görüşüblər.

Vuçiçin sözlərinə görə, danışıqlar Ukrayna və Serbiyanın Avropaya inteqrasiyası, ikitərəfli iqtisadi əməkdaşlıq və enerji sektorunda əməkdaşlıq mövzularına yönələcək.

Serbiya lideri qeyd edib ki, tərəflər həmçinin Avropaya inteqrasiya prosesində qarşılıqlı dəstək və təcrübə mübadiləsi üçün mümkün yolları araşdıracaqlar.

Bundan əlavə, Vuçiçin sözlərinə görə, görüşdə mədəniyyət, idman və digər mövzularda əməkdaşlıq da müzakirə oluna bilər.