Yevgeni Xmara Britaniyanın Müdafiə Nazirliyi ilə HHM məsələləri üzrə əməkdaşlığı müzakirə edib

Ukrayna müdafiə nazirinin səlahiyyətlərini müvəqqəti icra edən Yevgeni Xmara yeni təyin olunmuş britaniyalı həmkarı Ues Stritinqlə Ukraynanın hava hücumundan müdafiəsinin (HHM) və hava imkanlarının gücləndirilməsini müzakirə edib.

"Report" xəbər verir ki, bu barədə Y. Xmara teleqram sosial şəbəkəsindəki səhifəsində yazıb.

"Böyük Britaniyanın müdafiə naziri Ues Stritinqlə ilk söhbətimiz zamanı onu təyinatı münasibətilə təbrik etdim və Ukraynaya yardıma görə təşəkkürümü bildirdim. Müzakirələrin əsas mövzusu Ukrayna səmasının müdafiəsinin gücləndirilməsi istiqamətində addımlardır. "Gripen" təyyarələrinin və onlar üçün "Meteor" raketlərinin tədarükü layihəsinə dəstək gözləyirik. Bu, Rusiya təyyarələrinə qarşı mübarizə və xalqımızın qorunması üçün vacibdir", – o yazıb.

Onun sözlərinə görə, "F-16" təyyarələri üçün döyüş sursatlarının tədarükünü davam etdirmək də son dərəcə vacibdir:

"Xüsusi diqqət mərkəzində "Shahed"lərə qarşı mübarizə üçün nəzərdə tutulan raketlərdir. Rusiya reaktiv dronlarla zərbələri artırır. Tərəfdaşların sürətli qərarları birbaşa olaraq ukraynalıların həyatını xilas etməyə qadirdir. Eyni zamanda, dondurulmuş Rusiya aktivlərindən əldə edilən gəlirlər hesabına Müdafiə Qüvvələrinin ehtiyacları üçün Ukrayna dronlarının – xüsusən də zərərsizləşdiricilər, "middle strike" və "deep strike"in – alınmasını müzakirə etdik".

O əlavə edib ki, Ukrayna öz növbəsində müasir müharibə təcrübəsini və döyüş meydanında artıq öz səmərəliliyini sübut etmiş həllərini bölüşməyə hazırdır.