Usman Sou: Kənd yerlərində gəlirlərin azalması Malidə urbanizasiyanı gücləndirir

Malidə urbanizasiya iqlim amilləri və kənd yerlərində gəlirlərin azalması səbəbindən güclənir.

"Report" xəbər verir ki, bu barədə Bamako (Mali) Böyük Metropoliten Aqlomerasiyasının daimi katibi Usman Sou Bakıda WUF13 çərçivəsində keçirilən tədbirdə bildirib.

Onun sözlərinə görə, ölkədə urbanizasiyanın artması, xüsusən də quraqlıq və kənd təsərrüfatı fəaliyyəti dövrünün qısalması səbəbindən kənd yerlərində yaşayış şəraitinin pisləşməsi ilə birbaşa bağlıdır.

"Urbanizasiyanın artmasının səbəbi kəndlilərin kəndləri tərk edərək şəhərlərə getməsidir. Niyə? Quraqlığa görə: kənd təsərrüfatı artıq gəlir gətirmir. Yağış mövsümü 3–4 ay davam edir, mövsümlər arasında isə insanlar işsiz qalırlar", - deyə o qeyd edib.

Usman Sou vurğulayıb ki, həll yolu kimi şəhərətrafı kənd təsərrüfatının inkişafı planlaşdırılır ki, bu da əhaliyə mövsümlərarası dövrdə gəlir əldə etməyə və şəhərlərə düşən təzyiqi azaltmağa imkan verəcək. Onun sözlərinə görə, bu tədbir həmçinin DİM 1 (yoxsulluğun ləğvi), DİM 2 (aclığın ləğvi) və DİM 7 (sərfəli və təmiz enerji) daxil olmaqla Dayanıqlı İnkişaf Məqsədlərinə nail olunmasına töhfə verir.

O əlavə edib ki, urbanizasiya şəraitində su istehlakının artması çirkab suların həcminin çoxalmasına gətirib çıxarır ki, bu da infrastruktur sahəsində sistemli həllər tələb edir. Bununla əlaqədar olaraq, beş təmizləyici stansiyanın və beş tullantı poliqonunun tikintisi nəzərdə tutulub.

Bu tədbirlər, deyə o qeyd edib, həmçinin təmiz suya və sanitariyaya çıxışın təmin edilməsi ilə bağlı olan DİM 6-ya nail olmağa yönəlib.