Tramp Əş-Şaraanı İsraillə münasibətləri normallaşdırmağa çağırıb

ABŞ Prezidenti Donald Tramp daha çox ölkənin İsraillə münasibətlərini normallaşdıracağına ümid etdiyini bildirib.

“Report”un xarici KİV-ə istinadən verdiyi məlumata görə, D.Tramp bunu Ər-Riyadda Suriyanın keçid dövrü Prezidenti Əhməd Əş-Şaraa ilə görüşündə bildirib.

ABŞ Prezidentinin sözlərinə görə, "regionda daha çox ölkə İsraillə münasibətlərin normallaşdırılması üçün “İbrahim Sazişləri”nə qoşulacaq".

O, həmçinin Suriyanın keçid dövrü Prezidenti Əhməd Əş-Şaraanı sazişlər çərçivəsində İsraillə münasibətləri normallaşdırmağa çağırıb.

Ağ Ev rəhbəri, həmçinin Əş-Şaraanı "bütün xarici terrorçuları Suriyadan deportasiya etməyə" çağırıb. Digər tələblər arasında ABŞ-yə İŞİD terror qruplaşmasının dirçəlməsinin qarşısını almaqda kömək etmək və s. var.