Tramp NATO-nun avropalı üzvlərinin hərbi potensialını tənqid edib

ABŞ Prezidenti Donald Tramp Vaşinqtonun NATO üzrə avropalı müttəfiqlərinin hərbi imkanlarının zəif olduğunu bildirib.

"Report" xəbər verir ki, ABŞ lideri bu barədə Nevada ştatının Las-Veqas şəhəri yaxınlığında çıxışı zamanı danışıb.

Onun sözlərinə görə, keçmiş prezident Co Bayden administrasiyası böyük həcmdə silah-sursat tədarük etməklə ABŞ ordusunun imkanlarını zəiflədib.

"Mən hər şeyi satıram, onlar isə - avropalılar ödəməyə hazırdırlar. Onların yaxşı silahlı qüvvələri yoxdur, çünki çox uzun müddət bizə güvəniblər. Mən onlara dedim ki, NATO artıq belə fəaliyyət göstərə bilməz", - deyə Tramp bildirib.

ABŞ prezidenti əvvəlki administrasiyanın siyasətini də yenidən tənqid edib. O, Bayden hökumətinin "yüz milyardlarla dollar" xərclədiyini iddia edib, lakin söhbətin konkret hansı xərclərdən getdiyini açıqlamayıb.