Tramp ABŞ Hərbi Dəniz Qüvvələri naziri vəzifəsinə Hunq Kaonun namizədliyini irəli sürüb

ABŞ Prezidenti Donald Tramp Birləşmiş Ştatların Hərbi Dəniz Qüvvələri nazirinin səlahiyyətlərini icra edən Hunq Kaonun bu vəzifəyə namizədliyini irəli sürüb.

"Report"un məlumatına görə, Ağ Ev rəhbəri bu barədə "Truth Social" sosial şəbəkəsində bildirib.

"Əsl döyüşçü Hunq Kaonun namizədliyini Hərbi Dəniz Qüvvələrinin növbəti naziri vəzifəsinə irəli sürməkdən məmnunam", - Tramp yazıb.

ABŞ Prezidenti həmçinin Senatı Kaonu vəzifəsində davam etdirə bilməsi üçün mümkün qədər tez təsdiqləməyə çağırıb.

Kao Con Pelanın istefasından sonra apreldən bəri Hərbi Dəniz Qüvvələri naziri vəzifəsini icra edir. Əvvəllər o, Hərbi Dəniz Qüvvələri nazirinin müavini vəzifəsində çalışıb.