Sebastyen Lekornyu Fransanın gələn il üçün büdcə kəsiri planını açıqlayıb

Fransanın Baş naziri Sebastyen Lekornyu gələn il üçün büdcə kəsirinin aşağı səviyyədə azaldılmasını planlaşdırır və əvvəlki üç faizlik həddən imtina edərək ÜDM-in təxminən 5 %-ni hədəfləyir.

Bu barədə "Report"un Avropa bürosu Fransa mətbuatına istinadən xəbər verir.

Hökumət büdcə layihəsini sentyabrın 30-da, qanunla nəzərdə tutulmuş son müddətdən bir həftə əvvəl parlamentə təqdim etmək niyyətindədir.

Bildirilir ki, kabinet irimiqyaslı struktur islahatları və yeni vergilər olmadan kəsirin ÜDM-in 4,9 %-nə qədər azaldılmasına nail olmağa çalışır.

Bu, Fransanın kəsirinin 2029-cu ildə Aİ-nin ÜDM-in 3 %-i səviyyəsindəki limitindən aşağı salınması hədəfindən faktiki olaraq imtina etmək deməkdir.

Fransa hökuməti kəsiri azaltmağa və eyni zamanda, ilin sonunadək büdcənin qəbul edilməsini təmin etməyə çalışır.