Qırğızıstan baş prokurorunun səlahiyyətlərini müvəqqəti olaraq birinci müavin icra edəcək

Qırğızıstan Prezidenti Sadır Japarov ölkənin baş prokurorunun səlahiyyətlərini müvəqqəti olaraq birinci müavin Abay Moldokmatova tapşırıb.

"Report" xəbər verir ki, müvafiq sərəncam dövlət başçısının saytında dərc olunub.

Prezident digər sərəncamla baş prokuror Kurmankul Zuluşevi müvəqqəti olaraq tutduğu vəzifədən uzaqlaşdırıb.

Bu tədbirlər Qırğızıstanın səhiyyə naziri Alımkadır Beyşenəliyevə qarşı cinayət işinə hərtərəfli və ədalətli baxılmasını təmin etmək məqsədilə həyata keçirilib.

İyunun 4-də səhər saatlarında Japarov Beyşenəliyevi tutduğu vəzifədən uzaqlaşdırıb. Daha sonra o, koronavirus peyvəndi ilə dələduzluq işi ilə bağlı həbs edilib. Onun dövlətə təxminən 18 milyon ABŞ dolları ziyan vurduğu deyilir.