Perunun XİN başçısı Prezidentin ABŞ-a səfəri ilə bağlı tənqidlərə görə istefa verib

Perunun xarici işlər naziri Ana Sesiliya Xervasi ölkə Prezidenti Dina Boluartenin ABŞ-a səfərindən sonra istefa verib.

“Report”un məlumatına görə, bu barədə “Reuters” yazıb.

Nəşrin məlumatına görə, dövlət başçısı protokol pozuntularına görə Amerika lideri Cozef Baydenlə tam ünsiyyət qura bilməyib.

"Nazirin istefası prezident Dina Boluartenin ABŞ-a səfərindən sonra baş verib, o, dövlət başçısı Cozef Baydenlə protokol görüşü keçirə bilməyib", - KİV yazıb.

Qeyd olunur ki, Peru Prezidenti istənilən rəsmi səfər üçün parlamentdən icazə almalıdır. Belə icazə Boluartenin Baydenlə görüşünün planlaşdırıldığı ABŞ-a səfəri üçün verilib. Lakin belə hallarda tələb olunan protokolla görüş baş tutmayıb. Eyni zamanda, XİN-in daha sonra izah etdiyi kimi, liderlər ünsiyyət qura və ikitərəfli əməkdaşlıq məsələlərini müzakirə edə biliblər.

Ölkənin bir sıra konqresmenləri səfərin təşkilini tənqid edərək, hökumətin səfərə icazə almaq üçün yanlış məlumat verdiyini bildiriblər.