Pakistan XİN: Məkkə alyansının genişləndirilməsi hələlik gündəmdə deyil

Pakistan, Səudiyyə Ərəbistanı və Türkiyə hələlik Məkkə müdafiə alyansının genişləndirilməsi mümkünlüyünü nəzərdən keçirmir.

"Report" "Dawn"a istinadən xəbər verir ki, bunu Pakistan Xarici İşlər Nazirliyinin rəsmisi Səccad Heydər Xan həftəlik brifinqdə bildirib.

Məlumata görə, birinci mərhələdə ölkələr qarşılıqlı fəaliyyəti gücləndirmək və birliyin strukturunu, mexanizmlərini və prosedurlarını razılaşdırmaq niyyətindədirlər.

Onun sözlərinə görə, Məkkə alyansı müdafiə xarakteri daşıyır və ilk növbədə, çəkindirmə vasitəsilə regional təhlükəsizliyin təmin edilməsinə xidmət edir.

"Hazırda sazişin genişləndirilməsi gündəmdə deyil. Pakistan, Səudiyyə Ərəbistanı və Türkiyə ilk növbədə, təşkilatı və əməkdaşlığı gücləndirməlidir", - XİN nümayəndəsi deyib.

O qeyd edib ki, bu mərhələ başa çatdıqdan sonra alyans oxşar mövqe və yanaşmalara malik olan dövlətlər üçün açıq olacaq.

"Bu mərhələdə Məkkə sazişinin genişləndirilməsi məsələsi ilə bağlı heç bir müzakirə aparılmır", - Xan vurğulayıb.

XİN nümayəndəsi əlavə edib ki, alyans formalaşmanın ilkin mərhələsindədir və tərəflər onun strukturu, prosedurları və digər məsələlərlə bağlı hərtərəfli məsləhətləşmələr aparmalıdırlar.

Birgə müdafiə haqqında Məkkə sazişi avqustun 7-də imzalanıb. Sənəd iştirakçı ölkələrdən birinə hücumun hamıya hücum kimi qiymətləndirilməsini nəzərdə tutur.