Nevada ştatında meşə yanğınları səbəbindən təxliyə elan edilib

ABŞ-nin qərbindəki Nevada ştatında təxminən 90 min nəfər meşə yanğını səbəbindən təxliyə ilə bağlı bildiriş alıb.

"Report" bu barədə "Associated Press" agentliyinə istinadən xəbər verir.

Məlumata görə, yanğın avqustun 22-də Rino şəhəri yaxınlığında başlayıb, təbii fəlakət nəticəsində üçü yanğınsöndürən olmaqla, altı nəfər xəsarət alıb.

Rəsmilər xəbərdarlıq ediblər ki, təxliyə olunmalı 90 min nəfərdən 42 mini təcili olaraq evlərini tərk etməlidir.

Bununla yanaşı, müstəntiqlər hesab edirlər ki, tüğyan edən yanğın antropogen xarakter daşıyır və bununla əlaqədar istintaq aparılır.