Mulino Dövlət Departamentini Panama kanalı administrasiyasının qərarları haqqında yalan danışmaqda ittiham edib

ABŞ Amerika gəmilərinin Panama kanalından rüsum ödəmədən keçə biləcəyini iddia edərək uydurmalar irəli sürür.

“Report” “Reuters”ə istinadən xəbər verir ki, bunu Panama Prezidenti Xose Raul Mulino deyib.

O, ABŞ ilə Panama arasında yalan və saxtakarlığa əsaslanan münasibətlərin idarə olunmasına bu cür yanaşmanı qəti şəkildə rədd etdiyini bildirib.

“Onlar niyə yalana əsaslanaraq prezidentin göstərişi ilə ABŞ-nin xarici siyasətini aparan təşkilatın adından mühüm institusional bəyanat verirlər? Dövlət Departamentinin bu bəyanatı qəbuledilməzdir”, - Mulino söyləyib.

Panama Prezidenti bildirib ki, o, Vaşinqtondakı səfirinə Tramp administrasiyasının iddialarını təkzib etmək üçün qətiyyətli addımlar atmağı tapşırıb.