Moldova səfiri Rusiya XİN-ə çağırılıb

Moldovanın Moskvadakı səfiri Lilian Dari Kişineunun respublikada keçiriləcək parlament seçkilərində Rusiya müşahidəçilərinin akkreditasiyasından imtina etməsi ilə əlaqədar RF Xarici İşlər Nazirliyinə (XİN) çağırılıb.

"Report" xəbər verir ki, bu barədə XİN-dən bildirilib.

"Sentyabrın 24-də Moldova Respublikasının Rusiya Federasiyasındakı səfiri Lilian Dari Xarici İşlər Nazirliyinə çağırılıb. Moldova diplomatik missiyasının rəhbərinə ölkə hökumətinin Rusiya nümayəndələrinin ATƏT/DTİHB-in monitorinq missiyasının tərkibində qısamüddətli müşahidəçi qismində, eləcə də Rusiya Federasiyası İctimai Palatasının üzvlərinin sentyabrın 28-də Moldovada keçiriləcək parlament seçkilərində beynəlxalq müşahidəçi qismində akkreditasiyasından əsassız imtinası ilə əlaqədar qəti etiraz bildirilib", - məlumatda qeyd olunub.

"Kişineunun qeyd olunan hərəkətləri qarşıdan gələn seçkilərin legitimliyinə və səsvermə prosedurunun şəffaflığına olan inamı ciddi şəkildə sarsıdır", - XİN-də bəyan ediblər.